Të paktën 8 persona kanë humbur jetën dhe 18 të tjerë rezultojnë të zhdukur, pasi një traget pasagjerësh u përmbys të dielën në det, pranë brigjeve të Qipros Veriore.
Sipas të dhënave të fundit të raportuara nga Reuters, në traget ndodheshin 267 persona, 259 pasagjerë dhe 8 anëtarë të ekuipazhit, ndërsa 241 persona janë shpëtuar.
Anija ishte nisur nga porti i Kyrenias (Girne) rreth orës 12:30 dhe po udhëtonte drejt portit Taşucu, në provincën turke të Mersinit. Pak pas nisjes, trageti filloi të merrte ujë për një shkak që ende nuk është përcaktuar.
Të mbijetuarit kanë treguar se anija po lëvizte në mënyrë të pazakontë dhe se një goditje e fortë me sipërfaqen e detit dyshohet se dëmtoi pjesën e përparme të katamaranit, duke lejuar futjen e ujit. Pamjet nga vendngjarja treguan pasagjerë me jelekë shpëtimi të mbledhur mbi trupin e përmbysur të anijes, në pritje të ekipeve të shpëtimit.
Operacioni i kërkim-shpëtimit vijon, ndërsa fakti që anija është fundosur në një thellësi prej rreth 500 metrash po e vështirëson ndjeshëm punën e ekipeve.
Autoritetet kanë ndaluar kapitenin dhe shtatë anëtarët e tjerë të ekuipazhit, ndërsa kanë nisur hetimet për të përcaktuar shkaqet e tragjedisë. Po hetohen gjithashtu pretendimet e disa të mbijetuarve për mënyrën se si ekuipazhi reagoi pasi anija nisi të merrte ujë.
Turqia ka angazhuar mjete detare dhe ajrore në operacion, ndërsa edhe Republika e Qipros ka deklaruar gatishmërinë për të ofruar ndihmë në kërkimin e personave që rezultojnë ende të zhdukur.
