Presidenti amerikan Donald Trump ka publikuar në rrjetin e tij Truth Social një video të krijuar me inteligjencë artificiale, ku shfaqet ishulli iranian Kharg, një nga qendrat më të rëndësishme të eksporteve të naftës së Iranit, duke u përfshirë nga shpërthime të fuqishme.
“Kharg Island po bëhet copë-copë!!! Presidenti DJT”, shkroi Trump krahas videos, pa dhënë shpjegime të tjera nëse po njoftonte një operacion ushtarak apo po paralajmëronte për një sulm të mundshëm.
Megjithatë, disa orë pas publikimit të videos nuk kishte asnjë provë se ishulli Kharg ishte sulmuar realisht. Reuters verifikoi pamjet dhe arriti në përfundimin se videoja me shpërthimet dramatike ishte, me shumë gjasa, e krijuar artificialisht. Shtëpia e Bardhë dhe Departamenti amerikan i Mbrojtjes nuk dhanë menjëherë sqarime për postimin e presidentit.
Kharg ka një rëndësi të jashtëzakonshme strategjike për Teheranin. Përpara nisjes së luftës më 28 shkurt, ishulli përpunonte rreth 90% të eksporteve iraniane të naftës, ndaj një goditje reale ndaj infrastrukturës së tij do të kishte pasoja të rënda për ekonominë iraniane dhe tregun e energjisë.
Postimi i Trump erdhi vetëm disa orë pasi SHBA kreu një sulm real në një tjetër ishull iranian, Larak, rreth 660 kilometra në lindje të Kharg. Forcat amerikane goditën dy lëshues iranianë, të cilët sipas një zyrtari amerikan po përgatiteshin të lëshonin raketa me mina detare në Ngushticën e Hormuzit.
Irani u kundërpërgjigj duke sulmuar bazat amerikane në Jordani. Autoritetet jordaneze njoftuan se tetë raketa që hynë në hapësirën ajrore të vendit u interceptuan.
Në këtë klimë tensionesh, mbetet e paqartë nëse videoja e publikuar nga Trump ishte thjesht një kërcënim ndaj Teheranit apo sinjalizonte mundësinë e një sulmi të ardhshëm ndaj Khargut.
