Presidentja e përkohshme e Venezuelës, Delcy Rodriguez, ka deklaruar se marrëveshja e re e naftës me Shtetet e Bashkuara do të jetë në fuqi për 25 vjet dhe synon të rrisë ndjeshëm prodhimin e naftës në vend.
Duke folur për transmetuesin shtetëror VTV, Rodriguez e cilësoi marrëveshjen si “historike”, duke bërë të ditur se objektivi është që prodhimi ditor i naftës në Venezuelë të kalojë 1.5 milionë fuçi.
“Qëllimi ynë është të shkojmë edhe më tej me nënshkrimin e marrëveshjeve të tjera të mëdha që përfshijnë kompani gjigante si Chevron, Repsol, Eni, Shell dhe BP. Ne duam të bëhemi një fuqi energjetike”, deklaroi Rodriguez.
Sipas saj, marrëveshja do të sjellë të ardhura të konsiderueshme për Venezuelën. Rodriguez tha se rreth 19 dollarë për çdo fuçi nafte të prodhuar dhe shitur do të shkojnë drejtpërdrejt në arkën e vendit.
Ajo deklaroi gjithashtu se, duke marrë si bazë një çmim prej 65 dollarësh për fuçi, marrëveshja mund t’i sigurojë Venezuelës rreth 209.3 miliardë dollarë të ardhura.
Projekti parashikon zhvillimin e tetë fushave të naftës bruto në Rripin e Naftës Orinoco, një prej zonave më të pasura me rezerva hidrokarburesh në Venezuelë, që shtrihet në më shumë se 55 mijë kilometra katrorë në pjesën lindore dhe qendrore-lindore të vendit.
Rodriguez tha se marrëveshja parashikon gjithashtu një normë royaltiesh prej të paktën 16% dhe një normë tatimi mbi të ardhurat prej 34%.
Sipas presidentes së përkohshme, këto kushte do të ndihmojnë në përshpejtimin e rimëkëmbjes ekonomike të Venezuelës dhe do t’i hapin rrugë një bashkëpunimi më të gjerë me kompanitë ndërkombëtare të energjisë.
