Një person ka humbur jetën dhe pesë të tjerë janë plagosur, disa prej tyre në gjendje të rëndë, pas të shtënave me armë zjarri gjatë një festivali të muzikës elektronike në qytetin Aarau të Zvicrës.
Ngjarja ndodhi rreth orës 03:00 të mëngjesit në zonën e Sachen, pranë hipodromit të Aaraut, ku po zhvillohej aktiviteti vjetor “Aarauer Rave”, një festë e madhe e muzikës elektronike që kishte mbledhur rreth 3,500 pjesëmarrës.
Policia kantonale e Aargaut bëri të ditur se të shtënat ndodhën mes një grupi të madh njerëzish. Autorët, identiteti i të cilëve ende nuk dihet, u larguan nga vendngjarja dhe po kërkohen nga policia.
Pas të shtënave, autoritetet u bënë thirrje qytetarëve të shmangnin zonën, ndërsa në vendngjarje u zhvillua një operacion i gjerë policor dhe i shërbimeve të emergjencës.
Një dëshmitar, i cituar nga mediat zvicerane, e përshkroi momentin si një seri “shpërthimesh zjarri”.
Hetimet vijojnë për të zbardhur rrethanat dhe motivin e ngjarjes, si dhe për identifikimin dhe kapjen e autorëve.
