Angelo Esposito, 35-vjeçari italian që u arrestua ditën e djeshme në Tiranë, pasi vodhi një makinë “Audi Q5”, ka kyçur gojën për hetuesit, duke ngritur dyshime se mund të jetë i përfshirë në vepra të ndryshme penale në vendin e tij. Pas arrestimit, ai refuzoi të japë gjeneralitetet e tij, ndërsa nuk ishte i pajisur me asnjë dokument. Për këtë arsye, autoritetet shqiptare pritet të kërkojnë informacion nga Italia lidhur me të shkuarën e tij, nëse është ose jo i përfshirë në krime në vendin përtej Adriatikut.
Esposito vodhi një makinë në rrugën dytësore Durrës-Tiranë dhe u pikas nga policia në afërsi të Pallatit me Shigjeta në kryeqytet. Në momentin kur iu bë me shenjë të ndalohet, në përpjekje për t’u arratisur përplasi disa makina, duke rrezikuar jetën e drejtuesve të mjeteve të tjera apo pasagjerëve dhe lëndoi një punonjës policie.
Për momentin ndaj Esposito janë ngritur akuzat e vjedhjes, drejtimit të mjetit në mënyrë të parregullt dhe kundërshtimit të forcave të policisë. Ndërsa autoritetet mbeten në pritje të të dhënave nga Italia lidhur me të, po kryhen verifikime se prej sa kohësh ai ndodhej në Shqipëri dhe nëse është përfshirë në ngjarje të tjera.
