Banorët e Patosit kanë protestuar për të katërtën herë kundër projektit për bashkimin e Bashkisë Patos me atë të Fierit, duke kërkuar që qyteti të ruajë autonominë vendore.
Protestuesit argumentojnë se Patosi ka kapacitetet financiare dhe administrative për të funksionuar si bashki më vete, ndërsa shprehin shqetësimin se një bashkim me Fierin mund të sjellë më pak investime dhe vëmendje ndaj nevojave të qytetit.
“Paratë dhe investimet duhet të përdoren për të zgjidhur problemet që kemi këtu në Patos”, deklaroi një prej banorëve.
Qytetarët e lidhin kundërshtimin edhe me historinë e Patosit si qytet i naftëtarëve, duke kërkuar ruajtjen e identitetit të tij.
Nëse kërkesat e tyre nuk merren parasysh, protestuesit paralajmërojnë përshkallëzim të protestave, duke mos përjashtuar edhe bllokimin e rrugëve që lidhin Patosin me zonat përreth.
