Një nga kapitujt më të errët të historisë moderne të Groenlandës është rikthyer në qendër të vëmendjes, pasi ekspertët kanë publikuar përfundimet e reja mbi fushatën e kontrollit të lindjeve të zhvilluar për dekada.
Të paktën 4 mijë gra dhe vajza groenlandeze, disa prej tyre vetëm 12 vjeç, morën pajisje intrauterine (IUD) ose injeksione kontraceptive mes viteve 1966 dhe 1991. Në shumë raste ndërhyrjet u kryen pa pëlqimin apo edhe pa dijeninë e tyre, sipas hetimit të përbashkët danezo-groenlandez.
Shumë prej vajzave ishin ende në shkollë kur iu vendosën pajisjet kontraceptive, ndërsa dëshmitë e mbledhura ndër vite kanë përshkruar dhimbje, gjakderdhje dhe pasoja të tjera fizike e psikologjike.
Programi u zhvillua në një periudhë kur Groenlanda ishte nën administrim të fortë danez dhe synonte, ndër të tjera, uljen e numrit të lindjeve.
Çështja ka shkaktuar zemërim të madh në Groenlandë dhe është kthyer në simbol të mënyrës se si autoritetet daneze trajtuan popullsinë indigjene gjatë shekullit të kaluar.
Ekspertët arritën në përfundimin se praktikat shkelën të drejtat e grave dhe vajzave, por nuk gjetën bazë të mjaftueshme për t’i klasifikuar ato juridikisht si gjenocid.
Rasti mbetet veçanërisht tronditës për shkak të moshës së disa prej vajzave dhe faktit se vendime që lidhen drejtpërdrejt me trupin dhe fertilitetin e tyre u morën pa pëlqimin e tyre.
Historia vazhdon të rëndojë marrëdhëniet mes Danimarkës dhe Groenlandës, ndërsa viktimat kërkojnë njohjen e plotë të asaj që u është bërë dhe përgjegjësi për një praktikë që vazhdoi për vite
