Një ish-operator i teleprompterit në Shtëpinë e Bardhë është urdhëruar të paguajë më shumë se 172 mijë dollarë, pasi përdori informacione të brendshme për të vënë baste mbi atë që presidenti amerikan Donald Trump do të thoshte në fjalimet e tij.
Gabriel Perez u zbulua se kishte kryer baste mbi përmbajtjen e fjalimeve të presidentit gjatë periudhës dhjetor 2025 – shkurt 2026 në Kalshi, një platformë ku përdoruesit mund të vendosin baste mbi ngjarje reale.
Komisioni Amerikan i Tregtimit të Kontratave të së Ardhmes (CFTC) njoftoi se Perez duhet të dorëzojë 107,539.02 dollarë fitime të siguruara nga këto baste dhe të paguajë një gjobë civile prej 65 mijë dollarësh.
Sipas autoritetit rregullator, Perez kishte përdorur njohuritë paraprake që kishte për fjalimet e Trump për të vendosur baste, duke shkelur detyrimin e tij për ruajtjen e konfidencialitetit.
Gjoba ndaj tij u reduktua për shkak të bashkëpunimit me hetimin. Atij gjithashtu i është ndaluar të kryejë tregtime për një periudhë prej tre vitesh.
Rasti u zbulua pasi Kalshi vuri re aktivitet të pazakontë në tregjet ku përdoruesit parashikojnë nëse një folës do të përmendë terma të caktuar, si emra shtetesh, slogane politike apo fjalë specifike.
Pas verifikimit të të dhënave të llogarisë, kompania zbuloi se përdoruesi ishte një punonjës federal që punonte me teleprompterët e Shtëpisë së Bardhë dhe e raportoi rastin tek autoritetet.
Në korrik, Shtëpia e Bardhë kishte njoftuar se Perez ishte vendosur në leje pa pagesë dhe se nuk do të rikthehej në detyrën e tij.
