UEFA ka nisur procedurë disiplinore ndaj mesfushorit të Fenerbahçes, Matteo Guendouzi, dhe sulmuesit Mason Greenwood, pas incidenteve të rënda të regjistruara në përfundim të ndeshjes së kthimit të play-off-it të Ligës së Kampionëve ndaj Lyonit.
Fenerbahçe triumfoi 2-1 në Francë dhe siguroi kualifikimin në fazën e ligës së Champions League, duke fituar me rezultatin e përgjithshëm 3-2.
Megjithatë, festa e skuadrës turke u shoqërua me tensione të mëdha pas vërshëllimës së fundit. Lojtarë dhe pjesëtarë të stafit të të dyja skuadrave u përfshinë në një përplasje masive në fushë, ndërsa situata për disa momente doli jashtë kontrollit.
Në qendër të incidentit ishte Guendouzi, i cili u duk se provokoi tifozët e Lyonit gjatë festimeve për kualifikimin. Mesfushori francez më pas shpjegoi se reagimi i tij erdhi si kundërpërgjigje ndaj fyerjeve të pretenduara nga tifozët, të cilat, sipas tij, kishin prekur edhe familjen e tij.
Fenerbahçe ka konfirmuar se UEFA ka hapur procedurë disiplinore ndaj Guendouzit, Greenwoodit dhe klubit turk për ngjarjet e ndodhura pas përfundimit të takimit.
Klubi ka bërë të ditur se do t’i paraqesë UEFA-s argumentet e tij dhe të gjitha dokumentet që konsideron të nevojshme në kuadër të procesit disiplinor.
Tashmë pritet vendimi i organeve disiplinore të UEFA-s për masat që mund të merren ndaj lojtarëve dhe Fenerbahçes, pas një mbrëmjeje që përfundoi me tensione të forta pavarësisht kualifikimit historik të skuadrës turke në fazën e ligës së Champions League.
