Cristiano Ronaldo mund të marrë një rol të ri te Al-Nassr pas përfundimit të karrierës së tij si futbollist. Ylli portugez raportohet se është pjesë e një konsorciumi që po përgatit një ofertë për blerjen e klubit saudit ku aktualisht luan.
Sipas raportimeve të fundit, Ronaldo është bashkuar me Gerry Cardinale, pronarin e Milanit dhe drejtuesin e RedBird Capital Partners, në përpjekjen për të marrë kontrollin e Al-Nassr. Në konsorcium bëjnë pjesë edhe tre biznesmenë të fuqishëm sauditë, Ibrahim Al-Muhaidib, Mohammed Al-Khuraiji dhe Sharaf Al-Hariri.
Sipas këtyre raportimeve, pesë anëtarët e grupit pritet të investojnë rreth 100 milionë dollarë secili, duke krijuar një fond fillestar prej afërsisht 500 milionë dollarësh për operacionin dhe financimin e klubit. Nëse marrëveshja do të realizohej, Ronaldo do të kalonte nga ylli kryesor i skuadrës në një prej bashkëpronarëve të saj.
Al-Nassr aktualisht është nën kontrollin e Fondit të Investimeve Publike të Arabisë Saudite (PIF), ndaj çdo ndryshim pronësie do të kërkonte marrëveshje me fondin. Sipas raportimeve, përfaqësues të RedBird dhe të konsorciumit pritet të zhvillojnë së shpejti bisedime me drejtuesit e PIF, në një takim që mund të jetë vendimtar për të ardhmen e negociatave.
Ronaldo, i cili mbetet figura kryesore e Al-Nassr, ka folur edhe më herët për fundin e karrierës së tij si futbollist dhe tashmë duket se po shqyrton mundësi për të vazhduar lidhjen me klubin edhe jashtë fushës. Nëse oferta do të pranohej, portugezi do të kishte mundësinë të bëhej njëkohësisht futbollist dhe bashkëpronar i skuadrës saudite.
Për momentin, bëhet fjalë për një ofertë në përgatitje dhe jo për një marrëveshje të përfunduar. Negociatat me PIF pritet të përcaktojnë nëse projekti i Ronaldo-s, Cardinale dhe investitorëve sauditë do të marrë dritën jeshile.
