Kancelari gjerman Friedrich Merz i ka bërë thirrje Iranit t’i japë fund aktiviteteve të tij destabilizuese në Lindjen e Mesme dhe të mos e zgjerojë konfliktin në Irak përmes grupeve të armatosura që mbështeten nga Teherani.
Në një konferencë të përbashkët për media në Berlin me kryeministrin irakian Ali al-Zaidi, Merz tha se diskutimet mes tyre u përqendruan te zhvillimet e fundit në rajon, përfshirë pasojat e luftës mes Shteteve të Bashkuara dhe Iranit, si dhe situatën në Ngushticën e Hormuzit.
“Mbështetja e Teheranit për grupet e tij të deleguara në gjithë rajonin duhet të marrë fund. Ne i shohim pasojat çdo ditë. Gjithashtu i bëjmë thirrje Iranit që të mos e shtrijë më tej konfliktin në Irak”, deklaroi kancelari gjerman.
Merz kërkoi gjithashtu që Irani t’i japë fund bllokadës së Ngushticës së Hormuzit, një prej korridoreve më të rëndësishme të transportit të energjisë në botë, ndërsa përsëriti kërkesën për ndalimin e programit bërthamor ushtarak të Teheranit.
Kancelari gjerman tha se Berlini mbështet përpjekjet e qeverisë irakiane për çarmatimin e milicive të mbështetura nga Irani dhe për rikthimin e stabilitetit në vend. Çështja është veçanërisht e ndjeshme për qeverinë e al-Zaidi, e cila po përballet me rezistencë nga grupet e armatosura pro-iraniane ndaj planit për çarmatimin e tyre.
Në fokus të bisedimeve ishte edhe situata në Detin e Kuq, ku Huthit e mbështetur nga Irani kanë forcuar pozitat e tyre përgjatë bregdetit të Jemenit dhe kanë marrë kontrollin e ishullit strategjik Mayyun, pranë Ngushticës Bab al-Mandeb.
“Huthit tani kontrollojnë pozicione strategjike rreth Ngushticës Bab al-Mandeb dhe po sulmojnë objektet energjetike në Arabinë Saudite. Kjo e përkeqëson më tej situatën në tregjet ndërkombëtare të energjisë”, tha Merz.
Ai paralajmëroi se komuniteti ndërkombëtar nuk mund të lejojë që Huthit të kontrollojnë transportin detar në Detin e Kuq, duke bërë të ditur se Gjermania po zhvillon konsultime brenda Bashkimit Evropian dhe me partnerët rajonalë për mënyrën se si mund të kontribuojë në përfundimin e konfliktit.
Situata në rajon është përshkallëzuar ndjeshëm ditët e fundit, ndërsa sulmet ndaj infrastrukturës energjetike saudite dhe pasiguria në Hormuz kanë shtuar shqetësimet për furnizimin global me naftë.
Merz foli gjithashtu për praninë ushtarake gjermane në Irak, duke konfirmuar se misioni aktual për këshillim dhe trajnim do të përfundojë më 30 shtator, me kërkesë të qeverisë irakiane.
“Kjo prani ushtarake përfundon më 30 shtator, me kërkesë të Irakut, një vendim që natyrisht e respektojmë”, deklaroi Merz, duke shtuar se Berlini mbetet i gatshëm të vazhdojë bashkëpunimin ushtarak me Bagdadin në forma të tjera, nëse kjo kërkohet nga qeveria irakiane.
Vizita e al-Zaidi në Berlin është pjesë e turit të tij të parë evropian që nga marrja e detyrës dhe vjen në një moment kur Iraku po përpiqet të ruajë stabilitetin e brendshëm, ndërsa lufta SHBA-Iran dhe aktiviteti i grupeve të armatosura të lidhura me Teheranin po e përfshijnë gjithnjë e më shumë rajonin në konflikt.
