Tregu britanik i punës po jep sinjale të reja dobësimi, pikërisht në një moment kur Banka e Anglisë duhet të vendosë nëse rritja e çmimeve të energjisë kërkon një tjetër rritje të normave të interesit.
Të dhënat e publikuara nga Zyra Kombëtare e Statistikave tregojnë se numri i vendeve të lira të punës në Britani ka rënë në 702 mijë.
Ky është niveli më i ulët që nga viti 2014, duke përjashtuar periudhën e pandemisë, dhe një tregues i qartë se kompanitë britanike po tregohen më të kujdesshme me punësimet.
Edhe numri i punonjësve në listëpagesat e kompanive ra me rreth 26 mijë persona gjatë gushtit.
Pagat mesatare, pa përfshirë bonuset, u rritën me 3.5% gjatë tre muajve deri në korrik, ritëm që po i afrohet nivelit më të ulët që prej vitit 2020.
Situata në sektorin privat është edhe më e dobët. Rritja e pagave atje zbriti në vetëm 2.9%, niveli më i ulët që nga fundi i vitit 2020.
Në kushte normale, këto shifra do t’i jepnin Bankës së Anglisë arsye për të mos rritur normat e interesit: tregu i punës po ftohet dhe presioni nga pagat po zvogëlohet.
Por problemi është nafta.
Lufta me Iranin dhe tensionet në Lindjen e Mesme kanë rritur fort çmimet e energjisë, duke krijuar frikë se inflacioni mund të përshpejtohet përsëri në Britani.
Kjo e vendos Bankën e Anglisë përballë një zgjedhjeje të vështirë: të mbështesë një ekonomi dhe treg pune që po dobësohen, apo të përdorë norma më të larta interesi për të parandaluar një valë të re inflacioni.
Pavarësisht shqetësimeve për energjinë, ekonomistët e anketuar nga Reuters presin që Banka e Anglisë t’i mbajë normat të pandryshuara në mbledhjen e kësaj jave.
Tregjet financiare, megjithatë, po llogarisin gjithnjë e më shumë mundësinë e një rritjeje më vonë gjatë vitit nëse çmimi i naftës mbetet i lartë.
Paundi britanik humbi lehtë terren pas publikimit të të dhënave dhe ka qëndruar pranë nivelit më të ulët të një muaji kundrejt dollarit.
Britania është veçanërisht e ekspozuar ndaj situatës sepse është importuese neto e naftës. Kjo do të thotë se rritja e çmimeve ndërkombëtare të energjisë mund të kalojë te kostot e transportit, bizneset dhe më pas te konsumatori.
Shifrat e reja krijojnë kështu një kombinim të vështirë për ekonominë britanike: më pak vende pune dhe punësime më të dobëta, por në të njëjtën kohë rrezik për rritje të re të inflacionit nga energjia.
