Një gjykatës federal amerikan ka bllokuar administratën e Donald Trump nga zbatimi i rregullave të reja që do të kufizonin kohën e qëndrimit në Shtetet e Bashkuara për studentët ndërkombëtarë, gazetarët e huaj dhe pjesëmarrësit në programet e shkëmbimit.
Vendimi u mor nga gjykatësi federal F. Dennis Saylor në Boston, vetëm një ditë përpara se rregullat e reja të hynin në fuqi.
Sipas planit të administratës Trump, studentët me viza të kategorisë F dhe personat në programet e shkëmbimit me viza J do të lejoheshin të qëndronin në SHBA për një periudhë të përcaktuar, në përgjithësi jo më shumë se katër vjet.
Për gazetarët e huaj me vizë të kategorisë I, kufizimi do të ishte edhe më i fortë: qëndrimi do të përcaktohej në 240 ditë, pas së cilës do të nevojitej një procedurë për zgjatjen e tij.
Ndryshimi do t’i jepte fund një sistemi që ka funksionuar prej afro 50 vjetësh, sipas të cilit shumë studentë dhe studiues të huaj mund të qëndrojnë në SHBA për aq kohë sa vazhdon programi i tyre akademik dhe ata respektojnë kushtet e vizës.
Administrata Trump argumentonte se sistemi aktual mund të abuzohej dhe se vendosja e afateve të përcaktuara do t’u jepte autoriteteve më shumë kontroll mbi personat që qëndrojnë për periudha të gjata në SHBA.
Gjykatësi nuk u bind nga argumentet e qeverisë. Ai e cilësoi arsyetimin e Departamentit të Sigurisë Kombëtare si “jashtëzakonisht të dobët” dhe tha se autoritetet nuk kishin shpjeguar bindshëm përse nevojitej një ndryshim kaq i madh.
Universitetet dhe organizatat që kundërshtuan rregullin paralajmëruan se kufizimet mund të shkaktonin rënie të regjistrimeve të studentëve ndërkombëtarë dhe të dëmtonin universitetet, kërkimin shkencor dhe ekonominë amerikane.
Mes institucioneve që mirëpritën vendimin janë edhe MIT dhe Harvard, ndërsa kundërshtarët e politikës argumentojnë se SHBA rrezikon të humbasë studentë dhe studiues të talentuar në favor të vendeve të tjera.
Vendimi i gjykatës do të thotë se, për momentin, sistemi ekzistues mbetet në fuqi ndërsa beteja ligjore vazhdon.
Është një tjetër pengesë gjyqësore për përpjekjet e administratës Trump për të forcuar rregullat e emigracionit dhe qëndrimit të shtetasve të huaj në Shtetet e Bashkuara.
