Organi përgjegjës për gjyqtarët, “Pro Ref”, ka pranuar se është bërë një “gabim në gjykim” gjatë procesit të VAR-it në derbin mes Manchester United dhe Manchester City, duke ndikuar në vendimin për golin e Erling Haalandit në fitoren 1-0 të skuadrës së Pep Guardiolës.
Goli i Haalandit, i shënuar në minutën e 60-të në “Old Trafford”, fillimisht u anulua për pozicion jashtë loje. Pas ndërhyrjes së VAR-it, vendimi u ndryshua dhe goli u akordua, pasi u konstatua se sulmuesi norvegjez ishte në pozicion të rregullt.
Megjithatë, “Pro Ref” ka sqaruar se VAR-i duhet t’i kishte rekomanduar gjyqtarit një rishikim në monitor, për shkak të pozicionit të Enzo Fernandez gjatë aksionit. Edhe pse Fernandez nuk e preku topin, prania e tij mund të kishte ndikuar në aksion dhe për këtë arsye vendimi konsiderohej subjektiv.
“Vendimi në fushë ishte për pozicion jashtë loje ndaj Erling Haalandit. Ky vendim u kontrollua nga VAR-i dhe u konstatua se ai ishte në pozicion të rregullt”, deklaroi një zëdhënës i “Pro Ref”.
Megjithatë, institucioni pranoi se VAR-i nuk e kishte vlerësuar siç duhet ndikimin e mundshëm të pozicionit të Fernandezit dhe duhej t’i kishte kërkuar gjyqtarit të shihte përsëritjen në monitor.
“Kemi kontaktuar me Manchester Unitedin këtë mbrëmje për të pranuar atë që ne e konsiderojmë si një gabim në gjykim. Incidenti do të shqyrtohet”, thuhet në deklaratën e “Pro Ref”.
Vendimi ka rikthyer debatet mbi përdorimin e VAR-it në Ligën Premier, ndërsa Manchester City e fitoi derbin 1-0 falë golit të Haalandit.
