Presidenti amerikan Donald Trump deklaroi se Shtetet e Bashkuara dhe Kuba do të arrijnë një marrëveshje dhe tha se nuk beson se do të jetë e nevojshme ndërhyrja ushtarake ndaj ishullit.
“Do të thoja se Kuba dhe ne do të bëjmë një marrëveshje. Nuk mendoj se do të na duhet ushtria”, u tha Trump gazetarëve në Shtëpinë e Bardhë. Presidenti amerikan shtoi se Uashingtoni dëshiron ta ndihmojë Kubën dhe “ta hapë Kubën për popullin amerikan”.
Deklarata vjen në një moment të tensionuar në marrëdhëniet mes Uashingtonit dhe Havanës. Administrata Trump ka deklaruar se synon ndryshimin e qeverisë kubane, ndërsa SHBA-ja ka shtuar presionin ekonomik ndaj vendit. Një bllokadë amerikane ndaj furnizimeve me naftë ka rënduar më tej krizën e karburantit dhe ndërprerjet e energjisë në Kubë.
Gjatë fjalimit të tij në Asamblenë e Përgjithshme të OKB-së të martën, Trump e cilësoi Kubën si një shtet të dështuar dhe deklaroi se liria do të vijë në ishull. Delegacioni kubanez u largua nga salla gjatë fjalimit të presidentit amerikan.
Nga ana tjetër, ministri i Jashtëm i Kubës, Bruno Rodriguez, deklaroi në OKB se Havana mbetet e gatshme për dialog me Uashingtonin. Ai tha se Kuba është e hapur edhe për marrëdhënie tregtare dhe biznesi me kompanitë amerikane, ndërsa kërkoi që dialogu të zhvillohet mbi bazën e barazisë sovrane dhe pa parakushte.
Rodriguez kritikoi gjithashtu embargon amerikane, të cilën e përshkroi si një masë ndëshkuese ndaj popullsisë kubane. Shtetet e Bashkuara e kanë mbajtur embargon ekonomike ndaj Kubës për më shumë se gjashtë dekada, ndërsa administrata Trump ka shtuar presionin ndaj qeverisë së Havanës.
