Shtetet e Bashkuara dhe Kina kanë rënë dakord të zgjasin edhe për dy muaj marrëveshjen e përkohshme që frenon përshkallëzimin e luftës tregtare mes dy ekonomive më të mëdha të botës.
Vendimi vjen pas takimeve mes presidentit amerikan Donald Trump dhe homologut të tij kinez Xi Jinping, i cili ndodhet në Shtetet e Bashkuara për një vizitë shtetërore.
Marrëveshja aktuale për tarifat tregtare ishte pranë skadimit, ndërsa palët kanë vendosur të ruajnë përkohësisht pezullimin e disa masave, duke e shtyrë afatin deri në muajin janar.
Tregtia ka qenë një nga çështjet kryesore të diskutimeve mes Trump dhe Xi. Në tryezë janë përfshirë gjithashtu mineralet e rralla, inteligjenca artificiale dhe çështje të tjera strategjike që ndikojnë në marrëdhëniet mes Uashingtonit dhe Pekinit.
Gjatë vizitës, të dy presidentët kanë përcjellë mesazhe për uljen e tensioneve. Xi Jinping ka deklaruar se Kina dhe SHBA duhet të jenë partnerë dhe jo rivalë, ndërsa Trump ka shprehur gatishmërinë për të vazhduar dialogun e drejtpërdrejtë me Pekinin.
Megjithatë, zgjatja e “armëpushimit” tregtar nuk përbën ende një marrëveshje përfundimtare mes dy vendeve. Për momentin, ajo u jep Uashingtonit dhe Pekinit më shumë kohë për negociata dhe shmang rikthimin e menjëhershëm të përplasjes së fortë tarifore.
