Një rrjedhje masive të dhënash ka nxjerrë në dritë sekretet e mijëra kazinove online dhe mënyrën se si funksionon nga brenda industria offshore e lojërave të fatit. Dosjet e publikuara mund të kenë pasoja të mëdha për kompani që operojnë në shumë vende të botës, përfshirë disa që janë akuzuar se kanë synuar ilegalisht konsumatorë në tregje ku nuk disponojnë licencë.
Rrjedhja, e quajtur “Casino Secrets”, përmban dhjetëra mijëra dokumente deri tani konfidenciale, të depozituara pranë autoritetit të lojërave të fatit në Curaçao, ishulli i Karaibeve që është kthyer në një nga qendrat kryesore botërore të licencimit të kazinove online.
Mes kompanive për të cilat gjenden të dhëna janë disa prej emrave më të mëdhenj të industrisë, përfshirë Stake.com, sponsor i Everton FC dhe veçanërisht i orientuar drejt basteve me kriptomonedha, rrjetin Santeda, si dhe BC.Game, sponsor i Leicester City FC.
Dokumentet përmbajnë informacione mbi pronarët realë të disa prej kazinove offshore, burimin e pasurisë së tyre, financimet, kreditë dhe marrëdhëniet mes kompanive që deri tani kanë qenë të vështira për t’u identifikuar.
Në qendër të rrjedhjes është Curaçao. Regjimi i tij historikisht jotransparent i licencimit e ka shndërruar ishullin në një superfuqi të industrisë offshore të basteve: aty rezultojnë të regjistruara më shumë se 8 mijë kazino online, afërsisht një për çdo 20 banorë.
Dokumentet pretendohet se janë siguruar nga hackerja me bazë në Berlin, Lilith Wittmann, e cila thotë se ka hyrë në një bazë të dhënash të Curaçao Gaming Authority. Vetë autoriteti ka konfirmuar se portali i tij ka qenë objekt i një “aksesi të paautorizuar”.
Një nga rastet më të rëndësishme që del nga dokumentet lidhet me Santeda International, rrjeti global i kazinove që ishte investiguar më parë nga The Guardian dhe Investigate Europe.
Investigimi kishte zbuluar se kazino të lidhura me Santeda dyshohej se synonin edhe lojtarë vulnerabël në Britaninë e Madhe, përfshirë persona që po përpiqeshin të hiqnin dorë nga kumari, megjithëse kompania nuk kishte licencë nga autoriteti britanik Gambling Commission.
Rrjedhja e re ngre pikëpyetje edhe mbi marrëdhëniet e Santeda me kompaninë Upgaming, të zotëruar dhe drejtuar nga biznesmenë gjeorgjianë.
Në informacionet e dorëzuara pranë autoritetit të Curaçao-s, si pronar i Santeda figuron gjeorgjiani Onise Chimakhidze. Por në të njëjtat dokumente shfaqen adresa emaili të Upgaming si kontakte, ndërsa një seri dokumentesh të depozituara pranë autoritetit përmbajnë emrin Upgaming edhe në emërtimin e skedarëve.
Avokatët e Upgaming kanë mohuar se kompania operon rrjetin Santeda dhe kanë deklaruar se nuk mund të shpjegojnë përse një palë e tretë ka përdorur të dhënat e kontaktit të kompanisë. Sipas tyre, një shpjegim i mundshëm është ekzistenca e një marrëdhënieje të mëparshme biznesi mes dy kompanive, tashmë e përfunduar.
Por dokumentet zbulojnë edhe lidhje financiare.
Santeda rezulton se i ka dhënë gjashtë hua me një vlerë totale prej 15.59 milionë eurosh kompanisë Buda Capital në Luksemburg. Kjo kompani zotërohet nga një grup gjeorgjianësh që kanë aksione ose poste drejtuese edhe në Upgaming.
Një dokument i vitit 2025 identifikon gjithashtu një person të quajtur Torniki Kapanadze si drejtues financiar të Santeda. Një profil në LinkedIn tregon se një Tornike Kapanadze punon për Upgaming. Avokatët e kompanisë kanë theksuar se bëhet fjalë për një emër të zakonshëm në Gjeorgji dhe kanë vënë në dukje ndryshimin në mënyrën e shkrimit të emrit.
Upgaming pretendon se është objekt i një “fushate të shënjestruar” nga palë me interesa të tyre tregtare.
Në dokumentet e “Casino Secrets” shfaqen edhe të dhëna për Oddsbet, kompani bastesh e orientuar drejt lojtarëve “VIP”, e cila, sipas të dhënave të rrjedhura, deri në vitin 2025 ishte në pronësi të britanikut Robert Bostock.
Përmasat e rrjedhjes e bëjnë “Casino Secrets” potencialisht një nga ekspozimet më të rëndësishme të viteve të fundit për industrinë globale të kumarit online. Përtej emrave të kompanive, dokumentet mund të ndihmojnë në rindërtimin e rrjeteve të pronësisë, financimit dhe operimit që qëndrojnë pas mijëra kazinove offshore dhe që për vite kanë funksionuar pas një perdeje të fortë anonimiteti.
