Pesë persona janë arrestuar në Britaninë e Madhe nën dyshimin për përgatitjen e një akti terrorist pranë bazës ajrore RAF Fairford. Presidenti amerikan Donald Trump përshëndeti operacionin e autoriteteve britanike, duke deklaruar se të dyshuarit po planifikonin të shkaktonin “dëm të madh”.
Presidenti i Shteteve të Bashkuara, Donald Trump, ka reaguar pas arrestimit të pesë personave pranë bazës ajrore RAF Fairford në Britaninë e Madhe, të cilët dyshohen se po përgatitnin një akt terrorist.
Duke folur para gazetarëve në Illinois, Trump e cilësoi arrestimin e të dyshuarve si një zhvillim “fantastik”, ndërsa vlerësoi bashkëpunimin mes autoriteteve amerikane dhe atyre britanike.
“Ne i kemi ndjekur ata për një kohë të gjatë dhe më në fund i kapëm”, deklaroi Trump.
Presidenti amerikan shtoi se të dyshuarit synonin të shkaktonin “dëm të madh”, por nuk dha hollësi të tjera lidhur me natyrën e planit të dyshuar apo rolin konkret që mund të kenë luajtur agjencitë amerikane në operacion.
5 persona arrestohen nën dyshimin për përgatitjen e një akti terrorist
Sipas autoriteteve britanike, incidenti nisi rreth orës 00:45 të së dielës, pasi policia mori një telefonatë lidhur me tre automjete të dyshimta që po lëviznin në drejtim të RAF Fairford.
Pas sinjalizimit, forcat e armatosura të policisë u dislokuan në zonë dhe ndërhynë duke arrestuar pesë persona. Të pestë u ndaluan nën dyshimin për përgatitjen e një akti terrorist.
Autoritetet kanë ngritur një perimetër sigurie prej rreth 400 metrash rreth automjeteve të dyshimta, ndërsa në vendngjarje janë angazhuar edhe specialistë të ushtrisë britanike për asgjësimin e mjeteve shpërthyese.
Kontrollet ndaj automjeteve dhe zonës përreth vijojnë, ndërsa autoritetet po punojnë për të përcaktuar nëse ekziston ndonjë rrezik tjetër për publikun. Policia britanike e ka klasifikuar ngjarjen si një “incident të madh”, por ka bërë të ditur se situata besohet të jetë nën kontroll.
Si masë paraprake sigurie, rreth 85 banesa në zonën përreth janë evakuuar. Banorëve u është kërkuar të respektojnë udhëzimet e autoriteteve dhe kufizimet e vendosura përreth zonës ku po zhvillohet operacioni.
Hetimet vijojnë për të përcaktuar rrethanat e plota të ngjarjes, objektivin e mundshëm të të dyshuarve dhe nëse persona të tjerë mund të kenë qenë të përfshirë.
RAF Fairford është një bazë e Forcave Ajrore Mbretërore britanike në Gloucestershire, e cila përdoret gjithashtu për operacione dhe dislokime të forcave ajrore amerikane.
