Presidenti i Serbisë Aleksandër Vuçiç ka zhvilluar të shtunën një bisedë telefonike me presidentin rus Vladimir Putin, një ditë përpara dorëheqjes së paralajmëruar nga posti i kreut të shtetit.
Vuçiç bëri të ditur se gjatë bisedës e kishte informuar homologun rus për vendimin e tij për t’u larguar nga posti i presidentit të Serbisë.
“Në emër të Republikës së Serbisë dhe në emrin tim, e falënderova Federatën Ruse dhe presidentin Putin për bashkëpunimin gjatë 14 vjetëve të fundit”, deklaroi Vuçiç.
Sipas tij, presidentët e ardhshëm të Serbisë do të duhet të vazhdojnë të mbrojnë interesat e vendit dhe të ruajnë ekuilibrin në marrëdhëniet me aktorët kryesorë të politikës ndërkombëtare.
Gjatë telefonatës, Vuçiç dhe Putin diskutuan për marrëdhëniet dypalëshe mes Serbisë dhe Rusisë, bashkëpunimin mes dy vendeve, luftën në Ukrainë dhe zhvillimet në Ballkan.
Një tjetër çështje e trajtuar ishte furnizimi i Serbisë me gaz rus. Vuçiç shprehu bindjen se aneksi i marrëveshjes mes Beogradit dhe Moskës për furnizimin me gaz do të zgjatet pas përfundimit të afatit aktual. Ai tha se pret që Serbia të vazhdojë të sigurojë gaz me çmime të favorshme.
Vuçiç pritet të paraqesë zyrtarisht dorëheqjen mbrëmjen e së dielës, më 27 shtator. Pas largimit të tij, funksionet e kreut të shtetit pritet t’i ushtrojë kryetarja e Kuvendit të Serbisë, Ana Brnabiç, deri në zgjedhjen e presidentit të ri, në përputhje me procedurat kushtetuese.
Vuçiç ka deklaruar gjithashtu se largimi nga Presidenca nuk nënkupton tërheqjen e tij nga politika. Ai pritet të përfshihet në fushatën për zgjedhjet e parakohshme parlamentare të 25 tetorit 2026, duke qenë në krye të listës së forcës politike në pushtet.
Në varësi të rezultatit të zgjedhjeve dhe procesit të formimit të qeverisë së re, Vuçiç synon të vazhdojë aktivitetin politik, ndërsa është përmendur edhe mundësia e rikthimit të tij në postin e kryeministrit.
