Presidenti i Shteteve të Bashkuara, Donald Trump, ka deklaruar se Irani ka pranuar "pothuajse gjithçka që na nevojitet" gjatë negociatave mes dy palëve.
Në një intervistë për CNBC, Trump theksoi se administrata e tij nuk synon ndryshimin e regjimit në Iran, por ritheksoi se Teherani nuk duhet të pajiset kurrë me armë bërthamore.
"Ne nuk po kërkojmë ndryshim regjimi. Irani nuk mund të ketë armë bërthamore", u shpreh presidenti amerikan.
Trump pretendoi gjithashtu se Irani është "neutralizuar plotësisht nga ana ushtarake", megjithëse pranoi se vendi ende disponon disa raketa.
"Ata kanë ende disa raketa, por edhe ato mund t'i shkatërrojmë", tha ai.
Gjatë intervistës, Trump përdori edhe një krahasim për të përshkruar situatën e Iranit, duke e cilësuar vendin si një "fëmijë të llastuar".
"Është si një fëmijë i llastuar nga prindërit e tij, i cili papritur përballet me trajtim të ashpër. I duhet pak kohë që të mësohet me këtë", deklaroi ai.
Presidenti amerikan e përshkroi gjithashtu Iranin si "ngacmuesin e Lindjes së Mesme".
Ndërkohë, bisedimet për arritjen e një marrëveshjeje përfundimtare që synon t'i japë fund konfliktit me Iranin kanë nisur këtë javë në Katar. Sipas raportimeve, raundi i ardhshëm i negociatave pritet të zhvillohet pas ceremonisë mortore të ish-udhëheqësit suprem të Iranit, Ajatollah Ali Khamenei.
