Grupi Parlamentar i Partisë Demokratike i është drejtuar Gjykatës Kushtetuese pas vendimit të Kuvendit për të mos miratuar ngritjen e komisioneve hetimore parlamentare lidhur me kontratat e investimeve në infrastrukturën rrugore dhe funksionimin e Agjencisë Kombëtare të Shoqërisë së Informacionit (AKSHI).
Kërkesa është firmosur nga 46 deputetë të opozitës, të cilët pretendojnë se Kuvendi ka shkelur Kushtetutën duke refuzuar krijimin e një prej mekanizmave kryesorë parlamentarë për transparencë dhe kontroll institucional, siç janë komisionet hetimore.
