Shtyhet seanca në Gjykatën Administrative për padinë e kryebashkiakut të Tiranës, Erion Veliaj, ndaj prokurorit të Posaçëm Ols Dado. Procesi gjyqësor zgjati vetëm pak minuta dhe u ndërpre për shkak të mungesës së avokatit Plarent Ndreca.
Gjatë seancës, Veliaj kërkoi shtyrjen e shqyrtimit të çështjes, duke theksuar se nuk mund të vazhdonte pa përfaqësim ligjor. “Mua më duhet ndihmë juridike. Pa ndihmën dhe asistencën e avokatit nuk mund ta vazhdoj seancën. Të shkuara djalit të avokatit”, deklaroi kryebashkiaku, duke lënë të kuptohet se mungesa e avokatit lidhej me arsye familjare.
Në këto kushte, Gjykata Administrative vendosi ta shtyjë seancën për datën 24 korrik.
Kryebashkiaku i Tiranës, Erion Veliaj, i cili po përballet me 13 akuza penale, ka paditur prokurorin e Posaçëm Ols Dado dhe kërkon largimin e tij nga sistemi i drejtësisë. Veliaj pretendon se Dado është emëruar në kundërshtim me ligjin, pasi sipas tij nuk plotësonte kriteret e nevojshme për t’u emëruar prokuror.
Njëkohësisht, Veliaj është i pandehur për 13 akuza penale, mes të cilave korrupsion, pastrim parash dhe fshehje pasurie.
