Po zhvillohet në Tiranë protesta e 33-të kundër qeverisë, e nisur në orën 19:00, pas tubimit të paradites para Kuvendit, ku pati përplasje mes protestuesve dhe policisë.
Ashtu si në ditët e mëparshme, protestuesit u mblodhën në sheshin “Skënderbej”, marshuan përgjatë bulevardit “Dëshmorët e Kombit” dhe u ndalën para Kryeministrisë, ku po lexohet deklarata e grupit koordinues.
Gazetari i News24, Klevin Muka, në emër të Grupit Koordinues të 33 protestave të zhvilluara në Tiranë, iu referua ngjarjeve të paradites para Kuvendit, duke deklaruar se protesta kishte si synim t’u përcillte deputetëve mesazhin se “nuk janë përfaqësuesit tanë”. Sipas tij, qytetarët ishin njoftuar të merrnin me vete vezë dhe miell për të goditur deputetët, ndërsa pretendoi se gjatë protestës pati dhunë ndaj protestuesve, arrestime dhe përdorim të shkopinjve të gomës e gazit lotsjellës nga policia.
Në deklaratë u akuzua qeveria se po përpiqet të njollosë një protestë që organizatorët e cilësuan si paqësore, ndërsa u theksua se tubimet do të vazhdojnë pa përdorur dhunë. “Nëse argumenti juaj është dhuna, argumenti ynë është rezistenca dhe qëndresa. Ne nuk do të dorëzohemi dhe do të vazhdojmë protestën në mënyrë paqësore deri sa të fitojmë”, thuhet në deklaratë.
Pas leximit të deklaratës, nismëtari Alben Kola u bëri thirrje qytetarëve të mos bien pre e provokimeve, duke deklaruar se protesta do të vijojë me karakter paqësor.
