Ish-deputeti i PD, Ervin Salianji, ka reaguar ashpër ndaj kreut të PD-së, Sali Berisha, duke e akuzuar se me vendimin për të bojkotuar seancën parlamentare të kësaj të enjteje i ka shërbyer politikisht kryeministrit Edi Rama.
Në një reagim të publikuar në rrjetet sociale, Salianji deklaron se në ditën kur qytetarët protestonin para Kuvendit, opozita duhej të përballej politikisht me mazhorancën në sallën e Parlamentit dhe jo të braktiste seancën.
Ai akuzon Berishën se po dëmton Partinë Demokratike në një moment të vështirë politik për qeverinë, ndërsa shton se mënyra e drejtimit të partisë po përjashton figura me kontribut dhe mbështetje elektorale.
Salianji kritikon edhe përbërjen e Kryesisë së PD-së, duke pretenduar se figura të votuara nga demokratët janë lënë jashtë strukturave drejtuese, ndërsa qarqe të rëndësishme, sipas tij, nuk përfaqësohen në mënyrë të drejtë.
“Nëse duam të largojmë Edi Ramën, duhet të largojmë më parë pengesën më të madhe të opozitës: Sali Berishën”, shprehet Salianji në reagimin e tij, duke e cilësuar kreun e PD-së si “kambalec politik” të kryeministrit.
Në fund të reagimit, ish-deputeti demokrat thekson se demokratët nuk do të lihen vetëm dhe se kontributi i tyre do të vlerësohet.
