Ndërsa jashtë godinës së Parlamentit qytetarët po zhvillojnë një protestë ku u bëjnë thirrje deputetëve të dorëzojnë mandatet, brenda në Kuvend ka nisur seanca plenare. Grupi parlamentar i Partisë Demokratike ka vendosur të mos marrë pjesë në punimet e sotme, çka nuk e ka penguar kryeparlamentarin Niko Peleshi të çelë seancën duke lexuar rendin e ditës përpara deputetëve të mazhorancës.
Nëpërmjet një deklarate zyrtare, Partia Demokratike ka sqaruar arsyet e këtij bojkoti, duke theksuar se në seancën e së martës mazhoranca refuzoi kërkesën për llogaridhënie nga kryeministri Edi Rama. Opozita kërkonte zhvillimin e një debati parlamentar mbi protestat qytetare që vijojnë prej më shumë se një muaji, si dhe mbi rekomandimet e Rezolutës së Parlamentit Evropian. Përveç kësaj, PD akuzon se në Konferencën e Kryetarëve është miratuar kalendari i punimeve deri në fund të sesionit, pa përfshirë në shqyrtim katër projektligje të depozituara prej tyre rreth një muaj më parë.
Si pasojë e kësaj mospjesëmarrjeje, u anuluan edhe interpelancat e programuara nga grupi parlamentar i PD-së. Deputetja Ina Zhupa kishte kërkuar një interpelancë me ministrin e Turizmit, Blendi Gonxhja, ndërsa deputeti Klevis Balliu kishte kërkuar një seancë pyetje-përgjigje me ministrin e Drejtësisë, Toni Gogu. Për të dyja këto raste, kryetari i Kuvendit, Niko Peleshi, u shpreh nga foltorja se, për shkak të mungesës, konsiderohet se deputetët kërkues janë tërhequr nga këto procedura.
Mungesa e deputetëve të PD në sallë i ka dhënë mundësinë deputetit të Lëvizjes Bashkë, Redi Muçi, të marrë rolin e opozitarit dhe të përplaset me mazhorancën që në nisje të seancës. Muçi shfrytëzoi fjalën e tij për të përsëritur thirrjet e protestuesve jashtë, duke theksuar se kryeministri duhet të japë dorëheqjen e menjëhershme.
Muçi gjithashtu replikoi me deputetin socialist Ardit Bido. Ai pretendoi se Bido, me urdhër të kreut të grupit parlamentar të PS-së, Taulant Balla, e ka vendosur në shënjestër dhe i është "qepur me bukë në trastë".
Nga ana e tij, Ardit Bido iu përgjigj akuzave duke thënë se ky lloj debati është thjesht një rutinë pune për ata që janë mësuar të punojnë vërtet. Megjithatë, tonet u ashpërsuan më tej kur Bido e quajti deputetin e Lëvizjes Bashkë "tradhtar", duke e akuzuar se nuk flet për çështjen e Çamërisë dhe duke e etiketuar publikisht si "vorio-epirot".
