Franca do të mbajë zgjedhjet e ardhshme presidenciale më 18 prill 2027, ndërsa raundi i dytë është planifikuar për 2 maj 2027. Lajmi është konfirmuar nga një burim i ekzekutivit francez, i cili bëri të ditur se vendimi do të zyrtarizohet në mbledhjen e Këshillit të Ministrave.
Zgjedhjet e vitit 2027 konsiderohen vendimtare për skenën politike franceze, pasi presidenti aktual Emmanuel Macron nuk mund të kandidojë për një mandat të tretë, duke qenë se Kushtetuta lejon vetëm dy mandate radhazi.
Partia e ekstremit të djathtë Tubimi Kombëtar (National Rally) e sheh këtë proces si mundësinë më të mirë deri më tani për të marrë drejtimin e vendit. Sondazhet e deritanishme tregojnë se kjo forcë politike mund të renditet e para në raundin e parë të votimit, megjithëse ende nuk është konfirmuar zyrtarisht kandidati i saj.
Marine Le Pen synon të kandidojë për herë të katërt për postin e presidentes, pasi garoi në vitin 2012 dhe më pas arriti dy herë në balotazh përballë Macron.
Megjithatë, kandidatura e saj mbetet e pasigurt. Më 7 korrik pritet vendimi i një gjykate apeli lidhur me një çështje që lidhet me pretendimet për punësime fiktive në Parlamentin Europian. Nëse ndalohet të ushtrojë funksione publike, Le Pen nuk do të mund të garojë në zgjedhjet presidenciale.
Sipas Kushtetutës franceze, zgjedhjet presidenciale duhet të zhvillohen nga 20 deri në 35 ditë para përfundimit të mandatit pesëvjeçar të presidentit në detyrë.
