I dërguari amerikan për Lindjen e Mesme, Steve Witkoff, së bashku me këshilltarin e lartë Jared Kushner, kanë mbërritur në Doha për të zhvilluar takime me ndërmjetësuesit nga Katari, njoftoi të martën Ministria e Jashtme e vendit të Gjirit. Sipas autoriteteve katariote, delegacioni amerikan është rikthyer në rajon për të marrë pjesë në raundin përmbyllës të bisedimeve që synojnë uljen e tensioneve dhe ndalimin e konfliktit me Iranin.
Zëdhënësi i Ministrisë së Jashtme të Katarit, Majed Al Ansari, deklaroi se “Steve Witkoff dhe Jared Kushner ndodhen në Doha për t’u takuar me ndërmjetësues dhe zyrtarë të Katarit”. Ai shtoi se diskutimet do të përfshijnë çështje të ndryshme rajonale, përfshirë negociatat me Iranin dhe situatën në Liban, duke theksuar se këto takime nuk janë një negociatë e drejtpërdrejtë me palën iraniane.
Ndërkohë, Irani ka bërë të ditur se këtë javë do të dërgojë delegacione në Katar, por ka këmbëngulur se nuk ka rënë dakord për asnjë takim me Shtetet e Bashkuara “në asnjë nivel”, pas sulmeve në Gjirin Persik që kanë komplikuar bisedimet ekzistuese. Nga ana tjetër, Donald Trump ka deklaruar se Teherani ka kërkuar një takim me zyrtarët amerikanë dhe se një takim i tillë ishte planifikuar të zhvillohej në Doha të martën.
Megjithatë, një prej negociatorëve kryesorë iranianë ka mohuar ekzistencën e ndonjë takimi të planifikuar, ndërsa zëdhënësi i Ministrisë së Jashtme të Iranit sqaroi se delegacioni iranian po shkon në Katar për të diskutuar kushtet e një marrëveshjeje të përkohshme me ndërmjetësim, pa përfshirjen e Shteteve të Bashkuara.
