Princ Harry dhe Meghan Markle mund të mos udhëtojnë në Mbretërinë e Bashkuar me fëmijët e tyre, pasi qeveria britanike ka refuzuar kërkesën për mbrojtje policore gjatë qëndrimit të tyre.
Çifti kishte planifikuar vizitën e parë familjare në Britani pas katër vitesh, me rastin e aktiviteteve të lidhura me Lojërat Invictus që do të zhvillohen në Birmingham gjatë muajit korrik. Harry shpresonte që djali i tij, Princi Archie, 7 vjeç, dhe vajza, Princesha Lilibet, 5 vjeçe, të takonin gjyshin e tyre, Mbretin Charles.
Megjithatë, sipas një burimi pranë Dukës së Sussex-it, planet janë vënë në rrezik pasi autoritetet nuk kanë miratuar kërkesën për mbrojtje policore pranë rezidencave mbretërore. Burimi tha se Harry është “thellësisht i dëshpëruar” dhe nuk dëshiron t’i ekspozojë fëmijët ndaj ndjekjes së paparacëve që nga momenti i mbërritjes në Britani.
Princi Harry po shqyrton alternativa për ta realizuar udhëtimin, por beson se pa garanci të mjaftueshme sigurie vizita mund të mos jetë e mundur.
Vizita do të ishte takimi i parë i Mbretit Charles me nipërit Archie dhe Lilibet që nga viti 2022, gjatë festimeve të Jubileut të Platinit të Mbretëreshës Elizabeth II.
Vitin e kaluar, Harry humbi betejën ligjore kundër Ministrisë së Brendshme britanike për të rikthyer mbrojtjen automatike policore gjatë vizitave në Mbretërinë e Bashkuar. Megjithatë, ai kishte kërkuar një rivlerësim të rrezikut, ndërsa priste vendimin përfundimtar nga komiteti përgjegjës për sigurinë e anëtarëve të familjes mbretërore dhe personaliteteve publike.
