Elon Musk ka shpërndarë në platformën e tij X filmin kontrovers të rikthimit të aktorit Armie Hammer, “Citizen Vigilante”, duke e bërë përkohësisht të aksesueshëm për më shumë se 240 milionë ndjekësit e tij. Lidhja për filmin ka qëndruar aktive për rreth 48 orë, përpara se të çaktivizohej të shtunën.
Filmi, i shkruar dhe i drejtuar nga regjisori gjerman Uwe Boll, u publikua më 19 qershor në Shtetet e Bashkuara. Sipas raportimeve, ai është ndaluar në Gjermani për shkak të skenave të dhunës grafike dhe mesazheve të pretenduara kundër emigrantëve.
Në film, Armie Hammer luan rolin e Sanders, një qytetar i zakonshëm që vendos të marrë drejtësinë në duart e veta pasi zhgënjehet nga rritja e kriminalitetit dhe dështimi i rendit dhe ligjit, siç paraqitet në rrëfim.
Sipas “The Telegraph”, regjisori Boll ka deklaruar se projekti është konceptuar si një thriller politik që pasqyron tensionet aktuale shoqërore, dhe jo si një fantazi për drejtësi private.
“Tema është para syve tanë”, është shprehur Boll, duke shtuar se ai ka tentuar gjithmonë të fusë elementë politikë në filmat e tij të zhanrit.
Në kastin e filmit marrin pjesë edhe Costas Mandylor, Desiree Giorgetti, Steffen Mennekes, Neb Chupin dhe Mukit Abdul Hamid.
Ndërkohë, Uwe Boll ka njoftuar në X se vazhdimi i filmit, “Citizen Vigilante 2”, pritet të publikohet në vitin 2027.
Elon Musk, nga ana e tij, iu përgjigj një postimi që e rendiste filmin në vendin e dytë në Apple TV, duke shkruar: “Citizen Vigilante 2 do të jetë edhe më i mirë”.
