Më shumë se 68,000 persona raportohet se janë ende të zhdukur në Venezuelë, pas dy tërmeteve të fuqishme që goditën vendin në fillim të javës dhe shkaktuan shkatërrime masive.
Tërmetet me magnitudë 7.2 dhe 7.5 ballë kanë lënë pas një bilanc tragjik me 1,430 viktima dhe 3,238 të plagosur, ndërsa zona të tëra janë kthyer në rrënoja.
Autoritetet venezuelase thonë se rreth 30,000 pjesëtarë të ekipeve të emergjencës po udhëheqin operacionet e kërkim-shpëtimit, të ndihmuar nga ekipe ndërkombëtare që kanë mbërritur nga 24 vende të ndryshme. Deri tani janë dërguar 521 ton ndihma, 86 ekipe me qen kërkim-shpëtimi dhe mijëra efektivë mbështetës.
Presidentja në detyrë e Venezuelës, Delcy Rodriguez, ka deklaruar se situata mbetet kritike dhe se përpjekjet po vijojnë pa ndërprerje për gjetjen e të mbijetuarve. Në shumë zona, banorët lokalë po marrin pjesë vetë në kërkimet mes rrënojave, në një garë me kohën për të shpëtuar jetë.
Ndërkohë, diplomatja e lartë e Bashkimit Evropian, Kaja Kallas, ka shprehur solidaritetin me popullin venezuelas pas një bisede me autoritetet vendase, duke konfirmuar edhe një ndihmë emergjente prej 5 milionë eurosh nga Bashkimi Evropian.
Sipas një vlerësimi paraprak të Programit të Kombeve të Bashkuara për Zhvillim, dëmet e drejtpërdrejta nga tërmetet vlerësohen në rreth 6.7 miliardë dollarë.
