Fondacioni Hind Rajab, një organizatë për të drejtat e njeriut me seli në Belgjikë, ka bërë të ditur se ka paraqitur një kërkesë pranë Departamentit të Drejtësisë së Shteteve të Bashkuara të Amerikës për ndjekjen penale të ministrit izraelit të Sigurisë Kombëtare, Itamar Ben-Gvir.
Sipas organizatës, kërkesa lidhet me akuza për krime lufte, akte gjenocidi dhe nxitje të gjenocidit. Ankesa është dorëzuar përpara vizitës së pritshme të ministrit në Nju Jork më 7 dhe 8 korrik.
Në dokumentet e paraqitura, fondacioni pretendon se Ben-Gvir ka mbikëqyrur politika që kanë çuar në torturë, keqtrajtim, vrasje dhe zhvendosje të detyruar të palestinezëve, veçanërisht në Shërbimin e Burgjeve të Izraelit, i cili ndodhet nën autoritetin e tij ministror.
Sipas akuzave, të burgosurit palestinezë janë përballur me forma të ndryshme abuzimi, përfshirë rrahje, pranga, privim nga gjumi, mungesë ushqimi, mohimin e kujdesit mjekësor dhe dhunë seksuale. Organizata pretendon gjithashtu se të paktën 46 palestinezë kanë humbur jetën në paraburgim mes tetorit 2023 dhe gushtit 2025.
Fondacioni ngre akuza edhe për keqtrajtim të pjesëmarrësve në flotilje që janë nisur drejt Gazës gjatë viteve 2025 dhe 2026, përfshirë shtetas amerikanë, pas ndalimit nga forcat izraelite.
Në kërkesën e tij, fondacioni i ka kërkuar Departamentit të Drejtësisë së Shteteve të Bashkuara të Amerikës të hapë një hetim penal formal, të lëshojë një urdhër arresti ose të ndalojë largimin e Ben-Gvir nga juridiksioni amerikan deri në përfundimin e hetimeve, si dhe të nisë procedurat ligjore sipas ligjeve amerikane për krimet e luftës dhe gjenocidin.
Përfaqësuesi i fondacionit në Shtetet e Bashkuara të Amerikës, Jake Romm, tha se Uashingtoni ka detyrim të veprojë, sidomos pasi akuzat përfshijnë edhe shtetas amerikanë.
Sipas tij, çdo shtet ka detyrim ta ndjekë penalisht dhe ta sjellë para drejtësisë një person të akuzuar për krime të tilla të rënda.
Fondacioni thekson se kjo nismë është pjesë e një përpjekjeje më të gjerë për të përdorur sistemet ligjore kombëtare ndaj individëve të dyshuar për përfshirje në krime ndërkombëtare në Rripin e Gazës.
