SHBA-ja ka ndërmarrë sulme të reja ndaj objektivave iraniane, pasi një dron goditi të shtunën një anije cisternë me flamur të Panamasë në Ngushticën e Hormuzit, duke rritur sërish tensionet mes dy vendeve.
Komanda Qendrore e SHBA-së njoftoi se sulmet kishin në shënjestër disa objektiva ushtarake në territorin iranian dhe u kryen si përgjigje ndaj, sipas saj, "agresionit të vazhdueshëm" kundër transportit tregtar detar.
Në reagim, Trupat e Gardës Revolucionare Islamike të Iranit deklaruan se kanë goditur me raketa dhe dronë baza ushtarake amerikane në Kuvajt dhe Bahrejn.
Sipas mediave shtetërore iraniane, sulmet kishin në shënjestër bazën ajrore Ali al-Salem në Kuvajt dhe bazën e Flotës së Pestë Detare të SHBA-së në Port Salman të Bahrejnit.
Pas përshkallëzimit të ri, të dyja palët akuzuan njëra-tjetrën për shkeljen e marrëveshjes së armëpushimit, raportoi BBC.
Sipas CENTCOM-it, Irani kishte mundësinë të respektonte armëpushimin, por zgjodhi ta shkelte atë duke lëshuar një dron vetëshkatërrues që goditi cisternën MT Kiku, me flamur të Panamasë.
Si kundërpërgjigje, avionët luftarakë amerikanë bombarduan 10 objektiva ushtarake në dhe pranë Ngushticës së Hormuzit. Mes objektivave të goditura ishin sisteme të mbrojtjes ajrore, pajisje ushtarake, qendra komunikimi dhe depo dronësh.
Nga ana tjetër, Garda Revolucionare iraniane pretendoi se SHBA-ja kishte sulmuar pesë poste bregdetare në Iran, ndërsa justifikoi sulmet ndaj bazave amerikane si përgjigje ndaj veprimeve të Uashingtonit.
IRGC deklaroi gjithashtu se raketat balistike dhe dronët e saj goditën tetë objekte kyçe të infrastrukturës ushtarake amerikane në Kuvajt dhe Bahrejn, duke pretenduar se ato janë shkatërruar. Deri tani, këto pretendime nuk janë konfirmuar në mënyrë të pavarur.
