Presidenti i Shteteve të Bashkuara, Donald Trump, prezantoi të premten pasaportën e re koleksionuese amerikane me portretin e tij, në kuadër të festimeve për 250-vjetorin e Deklaratës së Pavarësisë së SHBA-së.
Në një postim në platformën Truth Social, Trump shkroi: “Pasaporta e re e SHBA-së thotë: ‘Mirë se vini, por silluni mirë’.”
Kopertina e pasaportës paraqet presidentin Trump me një pamje serioze, të mbështetur mbi tavolinën e punës, ndërsa në sfond shfaqet teksti i Deklaratës së Pavarësisë së Shteteve të Bashkuara. Në pjesën e poshtme është vendosur firma e tij. Portreti besohet të jetë bazuar në një fotografi të realizuar nga fotografi i Shtëpisë së Bardhë, Daniel Torok.
Në faqen e dytë të pasaportës është vendosur një pikturë që paraqet momentin historik të nënshkrimit të Deklaratës së Pavarësisë në vitin 1776, e shoqëruar me mbishkrimin: “Shtetet e Bashkuara të Amerikës 250”.
Shtëpia e Bardhë publikoi gjithashtu imazhet e pasaportës, duke e cilësuar atë si një “Pasaportë Patriotike”.
Kjo është hera e parë që një president amerikan në detyrë paraqitet në një pasaportë të SHBA-së.
Njoftimi vjen në kuadër të disa vendimeve dhe iniciativave që synojnë të lënë gjurmën personale të Donald Trump në simbolet dhe institucionet amerikane, një qasje që ka nxitur reagime dhe kritika nga kundërshtarët e tij, të cilët e konsiderojnë si promovim të kultit të individit.
Po ashtu, është bërë e ditur se firma e Donald Trump do të përfshihet edhe në kartëmonedha koleksionuese, një tjetër risi e paprecedentë gjatë mandatit të një presidenti amerikan në detyrë.
