Presidenti i SHBA-së, Donald Trump, ka akuzuar Iranin për shkelje të marrëveshjes së armëpushimit, duke pretenduar se Teherani ka kryer sulme me dronë ndaj anijeve që lundrojnë në Ngushticën e Hormuzit.
Në një postim në platformën e tij Truth Social, Trump tha se Irani ka lëshuar të paktën katër dronë, njëri prej të cilëve, sipas tij, goditi drejtpërdrejt kuvertën e sipërme të një anijeje të madhe transporti.
Ai theksoi se anija pësoi dëmtime, por arriti të vazhdonte udhëtimin pa u ndalur.
Trump shtoi se forcat amerikane rrëzuan tre dronët e tjerë dhe e cilësoi incidentin si një “shkelje të pamend” të marrëveshjes së armëpushimit të arritur mes palëve.
Deklarata vjen në një moment të ndjeshëm për sigurinë në rajonin e Gjirit Persik, ndërsa tensionet mes SHBA-së dhe Iranit vazhdojnë të mbeten të larta pavarësisht përpjekjeve diplomatike për ruajtjen e armëpushimit.
