Marco Rubio ka bërë të ditur se grupi teknik i negociatave për çështjen e Iranit do të rikthehet në tryezë javën e ardhshme, duke sinjalizuar vazhdimin e bisedimeve mes palëve.
Duke folur për gazetarët gjatë vizitës së tij në Kuvajt, Rubio tha se takimet pritet të zhvillohen më 29 ose 30 të këtij muaji, ndërsa sipas tij, mbetet e mundur që ato të mbahen në Zvicër.
“Grupi teknik do të rikthehet, besoj, më 29 ose 30 të këtij muaji… në çdo rast, bisedimet do të vijojnë”, u shpreh ai.
Rubio ndodhet në një turne treditor në Emiratet e Bashkuara Arabe, Kuvajt dhe Bahrein, ku po diskuton me zyrtarë rajonalë zhvillimet lidhur me marrëveshjen e fundit SHBA–Iran.
Në Bahrein, ai pritet të zhvillojë edhe takime me përfaqësues të Këshillit të Bashkëpunimit të Gjirit, me fokus në prioritetet e përbashkëta të sigurisë në rajon.
Ai sqaroi gjithashtu se bisedimet teknike do të zhvillohen në nivel ekspertësh nga Departamenti i Shtetit, Departamenti i Energjisë dhe institucione të tjera amerikane.
“Niveli teknik nënkupton përfshirjen e stafit të specializuar që merret me detajet e marrëveshjes”, tha Rubio, duke theksuar se SHBA nuk do të ndërmarrë hapa që rrezikojnë sigurinë e aleatëve të saj në rajon.
