Komisioni i Posaçëm Parlamentar për Reformën Territoriale ka kërkuar zyrtarisht praninë e kryebashkiakut të Tiranës, Erion Veliaj, në dëgjesën që do të zhvillohet më 30 qershor për të diskutuar propozimet dhe shqetësimet që lidhen me reformën e re administrative-territoriale.
Kryetari i komisionit bëri të ditur se ftesa i është dërguar Bashkisë së Tiranës sipas të njëjtit standard që është ndjekur edhe për bashkitë e tjera të vendit, duke theksuar se komisioni ka kërkuar praninë e kryetarëve të zgjedhur dhe jo të nënkryetarëve apo përfaqësuesve të deleguar.
“Ne kemi caktuar një standard. Nuk kemi dëgjuar nënkryetarët, edhe kur kanë qenë të deleguar me porosi. Ftesën ia çojmë institucionit dhe institucioni merr masat përkatëse që të përfaqësohet nga personi që ka tagrin për të qenë kryetar i zgjedhur i bashkisë”, u shpreh ai.
Dëgjesa për Tiranën konsiderohet një nga më të rëndësishmet e procesit, pasi bëhet fjalë për bashkinë më të madhe në vend dhe për njësinë administrative që prek numrin më të madh të qytetarëve.
Megjithatë, pjesëmarrja e Veliajt mbetet ende e paqartë. Komisioni pret fillimisht një përgjigje zyrtare nga Bashkia e Tiranës, ndërsa më pas do të nevojiten edhe vlerësime dhe qëndrime nga institucionet kompetente, përfshirë SPAK-un dhe organet gjyqësore, për të përcaktuar nëse kryebashkiaku do të mund të lëvizë nga paraburgimi për të marrë pjesë në Kuvend.
Në javët e fundit, komisioni ka zhvilluar dëgjesa me një pjesë të madhe të kryetarëve të bashkive në vend, të cilët kanë paraqitur propozimet dhe vërejtjet e tyre për reformën e re territoriale. Rasti i Tiranës pritet të jetë një test institucional për mënyrën se si do të trajtohet kërkesa për pjesëmarrjen e Veliajt në procesin parlamentar.
Nëse autoritetet japin miratimin përkatës, kryebashkiaku i Tiranës mund të paraqitet në Kuvend më 30 qershor për të dhënë qëndrimin e tij mbi reformën territoriale. Në të kundërt, mbetet për t’u parë nëse Bashkia e Tiranës do të përfaqësohet në një formë tjetër apo nëse dëgjesa do të zhvillohet pa praninë e tij.
