Grupi politik Partisë Demokratike Evropiane ka reaguar ndaj deklaratave të kryeministrit Edi Rama gjatë një interviste për “Financial Times”, ku ai përdori gjuhë fyese ndaj protestuesve.
Në një deklaratë të publikuar në rrjetet sociale, Demokratët Europianë e akuzojnë Ramën se iu përgjigj qytetarëve me akuza, shmangie të përgjegjësisë dhe gjuhë përçmuese, në vend që të adresonte shqetësimet e ngritura prej tyre.
Sipas reagimit, çështje si tokat e mbrojtura, pastrimi i parave dhe përdorimi i pushtetit kërkojnë transparencë dhe respekt ndaj qytetarëve, e jo fyerje apo qëndrime përçmuese.
Në deklaratë theksohet gjithashtu se mënyra e komunikimit të kryeministrit ndaj protestuesve që kundërshtojnë një projekt resorti të lidhur me Jared Kushner nuk përbën, sipas tyre, një qasje udhëheqëse dhe demokratike.
Grupi politik vlerëson se në një shoqëri demokratike, shqetësimet e qytetarëve duhet të dëgjohen dhe të trajtohen me seriozitet, duke nënvizuar se Shqipëria ka nevojë për më shumë transparencë dhe më pak arrogancë institucionale.
