Një valë ekstreme të nxehti po përfshin Europën, duke thyer rekorde historike temperaturash dhe duke detyruar autoritetet të shpallin alarmet më të larta në shumë vende të kontinentit.
Franca regjistroi të martën ditën më të nxehtë në historinë e matjeve meteorologjike, me temperatura që arritën deri në 44.3 gradë Celsius, ndërsa më shumë se gjysma e vendit mbetet nën alarmin maksimal. Në Spanjë, termometri shënoi 45.1 gradë Celsius, ndërsa në Gjermani priten temperatura deri në 41 gradë në ditët në vijim.
Britania e Madhe po përballet me një situatë po aq të pazakontë. Shërbimi meteorologjik britanik paralajmëron se mund të thyhet rekordi i temperaturës më të lartë të regjistruar ndonjëherë për muajin qershor, me temperatura që pritet të arrijnë deri në 39 gradë Celsius në jug të Anglisë.
Pasojat tashmë janë të dukshme. Në Francë, të paktën 40 persona kanë humbur jetën nga mbytja gjatë javës së fundit, ndërsa kërkonin freski në liqene dhe kanale të pambikëqyrura. Në Britani janë raportuar probleme serioze në transportin hekurudhor, ndërsa në Francën veriperëndimore mbi 119 mijë familje mbetën pa energji elektrike pas mbingarkesës së rrjetit.
Shkencëtarët paralajmërojnë se Europa po ngrohet më shpejt se çdo kontinent tjetër në botë dhe se valët e të nxehtit po bëhen më të shpeshta, më intensive dhe më jetëgjata. Sipas vlerësimeve, vitet e fundit dhjetëra mijëra europianë kanë humbur jetën çdo vit si pasojë e temperaturave ekstreme.
Ndërsa Europa Perëndimore pritet të ketë një lehtësim të përkohshëm nga fundjava, vendet e Europës Lindore po përgatiten për ditë edhe më të nxehta, me temperatura që mund të afrohen sërish me 40 gradët Celsius.
