BUDAPEST – Mbi 10 mijë persona morën pjesë të shtunën në marshimin vjetor Budapest Pride, i pari që zhvillohet pas humbjes së ish-kryeministrit Viktor Orban në zgjedhjet e prillit.
Pjesëmarrësit marshuan në rrugët e kryeqytetit hungarez mes temperaturave rekord, duke mbajtur flamuj shumëngjyrësh të komunitetit LGBTQ+ dhe flamuj të Bashkimit Evropian.
Marshimi i vitit të kaluar ishte shndërruar në një protestë masive kundër qeverisë së Orbanit, pasi autoritetet kishin tentuar ta ndalonin në kuadër të politikave kufizuese ndaj të drejtave të komunitetit LGBTQ+. Këtë vit, pas ardhjes në pushtet të qeverisë së re të udhëhequr nga Peter Magyar dhe partia e tij Tisza, ndalimi u hoq dhe aktiviteti u lejua të zhvillohej.
“Atmosfera është shumë më optimiste tani. Shpresojmë që në të ardhmen të kemi më në fund të drejta të barabarta, përfshirë martesën dhe birësimin,” tha 18-vjeçarja Fanni Fajth, pjesëmarrëse në marshim.
Edhe Mate Tarnai, 51 vjeç, tha se ndryshimi më i madh është klima politike në vend. “Ndihemi më të lirë dhe atmosfera në Hungari është shumë më e qetë se një vit më parë,” u shpreh ai.
Gjatë 16 viteve në pushtet, Viktor Orban miratoi një sërë ligjesh që kufizonin të drejtat e komunitetit LGBTQ+, duke ndaluar ndryshimin e gjinisë në dokumentet personale, birësimin nga çiftet e të njëjtit seks dhe materialet shkollore që konsideroheshin si promovuese të homoseksualitetit ose tranzicionit gjinor.
Megjithëse kryeministri i ri Peter Magyar ka sinjalizuar një qasje më të moderuar, ai u ka kërkuar qytetarëve durim kur është pyetur për ndryshimin e legjislacionit që kufizon të drejtat e komunitetit LGBTQ+.
Për shumë pjesëmarrës, ndryshimi më i madh pas largimit të Orbanit nuk është vetëm politik, por edhe ndjenja e sigurisë dhe pranimit më të madh në jetën e përditshme.
