Zëvendëspresidenti i SHBA-së, J.D. Vance, ka lëshuar kritika ndaj Papa Leo XIV, ndërsa ka komentuar edhe çështjet e emigracionit, Iranit dhe politikës së jashtme amerikane.
Në një intervistë, Vance tha se debati për emigracionin nuk duhet të fokusohet vetëm te dinjiteti i emigrantëve, por edhe te mbrojtja e interesave të punëtorëve vendas.
“Ajo që shpresoj se udhëheqja katolike ka mësuar nga disa nga gjërat që unë, Marco Rubio dhe presidenti aktual Donald Trump kemi thënë për emigracionin është se nuk ka të bëjë vetëm me dinjitetin e emigrantit. Bëhet fjalë edhe për dinjitetin e punëtorëve vendas të fabrikave”, u shpreh ai.
Duke folur për Lindjen e Mesme, zëvendëspresidenti amerikan deklaroi se Shtetet e Bashkuara nuk do të lejojnë që Irani të vendosë tarifa për anijet që kalojnë në Ngushticën e Hormuzit.
“Kjo nuk do të përfundojë me iranianët që mbledhin taksa për anijet që kalojnë nëpër Ngushticën e Hormuzit”, tha Vance.
Ai theksoi gjithashtu se presidenti aktual Donald Trump është i gatshëm të urdhërojë ndërhyrje ushtarake vetëm nëse ato shërbejnë për arritjen e një objektivi të qartë strategjik.
“Ne duam angazhime të qëndrueshme, të verifikueshme dhe të bazuara në inspektime që sigurojnë se Irani do ta çmontojë plotësisht programin e tij bërthamor”, deklaroi ai.
Në fund, Vance u ndal edhe te situata në Liban, duke argumentuar se marrëveshja e paqes Liban-Izrael dhe marrëveshja mes SHBA-së dhe Iranit kanë një element të përbashkët.
“Madje mund të thuhet se, nëse e përputhim marrëveshjen e paqes Liban-Izrael me marrëveshjen e nënshkruar midis Iranit dhe SHBA-së, të dy dokumentet në thelb theksojnë të njëjtën pikë: që integriteti territorial i Libanit duhet të respektohet”, përfundoi ai.
