Një cisternë nafte është goditur me predhë pranë brigjeve të Omanit, në Ngushticën e Hormuzit, duke rikthyer shqetësimet për sigurinë e transportit detar në një prej korridoreve më strategjike të energjisë në botë.
Sulmi ndodhi ndërsa një delegacion i nivelit të lartë nga Pakistani, një prej ndërmjetësuesve kryesorë mes Shteteve të Bashkuara dhe Iranit, po përfundonte takimet në Teheran. Bisedimet synojnë gjetjen e një zgjidhjeje të negociuar për konfliktin që vijon prej afro gjashtë muajsh.
Sipas Organizatës së Operacioneve Tregtare Detare të Mbretërisë së Bashkuar (UKMTO), cisterna u godit mbrëmjen e së hënës, vetëm pak milje larg bregut lindor të Omanit.
Predha nxori jashtë funksionit motorin e anijes, ndërsa të gjithë anëtarët e ekuipazhit raportohet se janë të sigurt. Deri tani nuk janë raportuar pasoja mjedisore apo rrjedhje nafte në det.
Ngushtica e Hormuzit konsiderohet një nga rrugët detare më të rëndësishme për tregtinë globale të energjisë. Përpara nisjes së luftës më 28 shkurt, rreth një e pesta e naftës së tregtuar në nivel global kalonte përmes kësaj ngushtice.
Irani aktualisht ushtron kontroll të fortë mbi trafikun detar në Hormuz dhe gjatë konfliktit ka pasur raste kur është hapur zjarr ndaj anijeve që kanë tentuar të kalojnë nëpër ngushticë. Megjithatë, deri tani askush nuk ka marrë përgjegjësinë për sulmin ndaj cisternës.
Nga ana tjetër, edhe Shtetet e Bashkuara po zbatojnë një bllokadë ndaj porteve iraniane dhe kanë hapur zjarr ndaj anijeve gjatë konfliktit.
