Përfaqësuesi i lartë i Bordit të Paqes për Gazën, Nikolay Mladenov, ka deklaruar se Hamasi dhe fraksionet e tjera të armatosura në Gaza kanë rënë dakord për herë të parë të dorëzojnë armët dhe t’ia transferojnë autoritetin civil dhe të sigurisë një administrate kalimtare të njohur nga OKB-ja. Deklarata u bë gjatë një informimi në Këshillin e Sigurimit të Kombeve të Bashkuara për zbatimin e planit amerikan të paqes për Gazën.
Mladenov tha se udhërrëfyesi 15-pikësh parashikon çarmatimin e plotë të grupeve të armatosura, përfshirë dorëzimin e armëve të rënda, depot e armëve, tunelet dhe armët personale. Sipas tij, procesi do të zhvillohet në mënyrë graduale dhe do të verifikohet ndërkombëtarisht, ndërsa Komiteti Kombëtar për Administrimin e Gazës do të jetë institucioni i vetëm i autorizuar për kontrollin e armëve.
Sipas Mladenovit, zbatimi i planit lidhet me tre kushte kryesore: Dislokimin e Forcës Ndërkombëtare të Stabilizimit, përmbushjen e detyrimeve të Izraelit sipas marrëveshjeve të armëpushimit dhe respektimin nga Hamasi të angazhimeve për çarmatimin.
Në qendër të planit është edhe krijimi i një administrate kalimtare palestineze, e përbërë nga profesionistë të pavarur, e cila do të marrë përsipër administrimin civil të Gazës gjatë periudhës së tranzicionit.
Megjithatë, kryeministri izraelit Benjamin Netanyahu ka kundërshtuar më herët këtë renditje të hapave, duke këmbëngulur se Hamasi duhet të çarmatoset plotësisht përpara tërheqjes së forcave izraelite nga Gaza. Kjo mbetet një nga pikat kryesore të mosmarrëveshjes mbi zbatimin e planit.
Deklaratat e Mladenovit vijnë në një moment kritik për marrëveshjen e armëpushimit, ndërsa sulmet izraelite në Gaza vazhdojnë dhe palët përballen me presion për të kaluar nga marrëveshjet në zbatimin konkret të planit.
