Dy punonjës të aeroportit të Frankfurtit kanë humbur jetën pas infektimit me malarie, ndërsa numri i rasteve të konfirmuara mes stafit ka shkuar në gjashtë.
Sipas mediave gjermane dhe ndërkombëtare, rastet lidhen me të ashtuquajturën “malaria e aeroportit”, një formë shumë e rrallë infektimi që ndodh kur një mushkonjë e infektuar hyn në një avion, bagazh apo zonë ngarkese nga një vend ku malaria është e përhapur dhe më pas pickon njerëz në aeroport ose në afërsi të tij.
Autoritetet gjermane dyshojnë se mushkonja e infektuar ka mbërritur në Frankfurt gjatë muajit korrik, ndoshta në stivën e një avioni të ardhur nga një zonë me rrezik malarie. Robert Koch Institut ka bërë të ditur se rastet e raportuara në rajonin Rhein-Main kanë lidhje të mundshme me punën në aeroportin e Frankfurtit.
Fillimisht, në mesin e korrikut, Fraport njoftoi për katër punonjës të infektuar. Më pas numri i rasteve u rrit në gjashtë. Sipas autoriteteve shëndetësore në Frankfurt, dy prej të prekurve kanë vdekur: njëri në fillim të korrikut dhe tjetri gjatë muajit gusht. Katër punonjësit e tjerë janë trajtuar dhe, sipas raportimeve gjermane, gjendja e tyre është përmirësuar.
Fraport, kompania që menaxhon aeroportin, ka shprehur ngushëllime për familjarët e viktimave dhe ka forcuar masat e kontrollit. Në aeroport janë vendosur kurthe për mushkonjat, ndërsa insektet e kapura do të analizohen në laborator për të verifikuar nëse mbartin parazitin e malaries.
Punonjësit e aeroportit janë këshilluar të kërkojnë menjëherë ndihmë mjekësore nëse shfaqin simptoma si temperaturë, të dridhura, lodhje, dhimbje trupi apo shqetësime gastrointestinale, dhe të informojnë mjekët se punojnë në aeroport.
Autoritetet theksojnë se “malaria e aeroportit” nuk përhapet nga njeriu te njeriu. Transmetimi ndodh vetëm përmes pickimit nga mushkonja Anopheles e infektuar. Për pasagjerët dhe publikun e gjerë, rreziku vlerësohet i ulët, por rastet kanë ngritur shqetësim për sigurinë e punonjësve në një nga aeroportet më të mëdha të Europës.
Raste të ngjashme janë regjistruar edhe më parë në Frankfurt, përfshirë një rast në vitin 2023. Megjithatë, autoritetet gjermane e cilësojnë këtë formë infektimi si shumë të rrallë jashtë zonave ku malaria është endemike.
Burime: raportimet e Frankfurter Rundschau, Euronews dhe të dhënat e cituara nga Robert Koch Institut.
