Gazetarja Klodiana Lala ka zbardhur detaje të reja nga arrestimi i biznesmenit Ergys Agasi në Durrës këtë të mërkurë. Sipas Lalës, Agasi ishte mbajtur nën vëzhgim nga forcat operacionale, në koordinim me SPAK, ndërsa gjatë periudhës në arrati dyshohet se fshihej mes Elbasanit dhe Durrësit.
Lala tha se në momentin e ndërhyrjes, forcat operacionale dhe RENEA e kanë rrethuar, ndërsa Agasi nuk ka bërë rezistencë. Sipas informacioneve, ai e ka pasur të pamundur të largohej edhe për shkak të trafikut. Pas arrestimit është shoqëruar në Drejtorinë e Policisë së Tiranës. Aktualisht, Agasi po merret në pyetje nga oficerët e Byrosë Kombëtare të Hetimit (BKH). Në vijim, ai pritet të dalë përpara Gjykatës së Posaçme për t’u njohur me masën e sigurisë “arrest me burg”.
Lala tha se gjatë kohës që Agasi është mbajtur nën vëzhgim, janë evidentuar edhe persona që dyshohet se e kanë ndihmuar gjatë arratisë. Agasi mësohet se ka pasur takime në Durrës dhe Elbasan gjatë periudhës që ishte në kërkim, ndërsa mbetet për t’u sqaruar përse u zgjodh pikërisht mbrëmja e sotme për ndërhyrjen dhe arrestimin e tij.
Bashkë me Agasin u arrestua edhe Uljan Shpataraku, ish-zyrtar i Policisë së Shtetit dhe i konsideruar si person i afërt me ish-drejtorin e Përgjithshëm të Policisë, Ilir Proda. Ndërkohë, vijojnë kontrollet në zonën e Liqenit të Thatë, ku raportohet se kanë banesa si Agasi, ashtu edhe Shpataraku. Hetuesit po kryejnë veprime në kuadër të hetimeve pas arrestimit të dy personave.
Ish-zëvendëskryeministri Arben Ahmetaj e ka cilësuar më herët Agasin si “eminencën gri” të kryeministrit. Gjithashtu janë ngritur pretendime për ndikimin e Agasit në emërimet në Policinë e Shtetit, përfshirë periudhën kur institucioni drejtohej nga Ilir Proda.
