Presidenti amerikan Donald Trump ka deklaruar se “diçka mund të dalë” nga takimi i panjoftuar i drejtorit të CIA-s, John Ratcliffe, me zyrtarë të inteligjencës ruse në Moskë.
Ratcliffe udhëtoi të martën drejt kryeqytetit rus në një vizitë të pazakontë, e cila u zhvillua në fshehtësi dhe zgjati vetëm disa orë. Kremlini konfirmoi më pas se drejtori i CIA-s zhvilloi kontakte me shërbimet ruse të inteligjencës, por nuk u takua me presidentin Vladimir Putin.
Trump e përshkroi vizitën si “gjysmë rutinë”, duke theksuar se administrata amerikane po punon për t’i dhënë fund luftës në Ukrainë. “Diçka mund të dalë nga kjo”, tha presidenti amerikan, pa dhënë detaje mbi përmbajtjen e bisedimeve.
Edhe pse qëllimi i saktë i takimit nuk është bërë publik, vizita ka nxitur spekulime të shumta, veçanërisht për shkak të tensioneve mes Rusisë dhe NATO-s dhe ngecjes së përpjekjeve diplomatike për përfundimin e luftës në Ukrainë.
Zëdhënësi i Kremlinit, Dmitry Peskov, konfirmoi se Ratcliffe pati kontakte me shërbimet ruse të sigurisë dhe se Putin u informua menjëherë për rezultatet e tyre. Megjithatë, ai theksoi se nuk pati takim mes Ratcliffe dhe presidentit rus.
Vizita e Ratcliffe është veçanërisht e rëndësishme pasi ai është drejtori i parë i CIA-s që udhëton në Moskë që nga viti 2021, kur paraardhësi i tij William Burns zhvilloi bisedime me Putinin, vetëm pak muaj përpara pushtimit të plotë të Ukrainës.
