Ergys Agasi është konsideruar prej kohësh si një prej njerëzve më të afërt të Edi Ramës, madje nga kundërshtarët e tij politikë është cilësuar edhe si “eminenca gri” e kryeministrit. Por vetë Rama nuk e ka pranuar asnjëherë publikisht këtë rol. Sa herë është pyetur për Agasin, kryeministri ka zgjedhur ose ta shmangë emrin, ose ta mbrojë indirekt, duke thënë se nuk duhet folur për njerëz që “nuk janë aty”, “nuk kanë poste” dhe “nuk mund të mbrohen”.
Rasti më i fortë ishte intervista me RAI 3, në qershor 2024, kur gazetari italian e pyeti për Agasin, pasi Arben Ahmetaj e kishte quajtur “koordinatorin e Ramës me grupet kriminale”. Rama reagoi ashpër: “Mos e ul nivelin e gazetarisë.” Më pas tha se Agasi “është në punën e vet”, “nuk është këtu dhe nuk mund të mbrohet”, duke kërkuar që të mos “mbahen njerëzit në gojë kot”. Kur u pyet nëse Agasi ishte “njeriu hije” i pushtetit, Rama u përgjigj shkurt: “Jo.”
Emri i Agasit doli sërish në konferencën e fundvitit, më 30 dhjetor 2025, kur kryeministri u pyet nëse ai ishte pjesë e “skuadrës së suksesshme” të AKSHI-t, pasi emri i tij përmendej në dosjen e SPAK-ut për tenderat. Edhe atëherë Rama zgjodhi distancën: “Kjo është pjesë e hetimeve, por unë nuk kam asnjë dijeni për këtë dhe nuk mund të bëj asnjë koment për gjysmë të vërteta që dalin lart e poshtë.” Në vend që të fliste për Agasin, ai mbrojti publikisht drejtuesen e AKSHI-t, Mirlinda Karçanaj, duke thënë se ajo kishte “respektin e tij të padiskutueshëm”.
Në maj 2026, një tjetër episod u lexua politikisht: Rama dekoroi Bardhyl Agasin, babain e Ergys Agasit, si “qytetar shembullor” të Durrësit. Kryeministri nuk e përmendi djalin gjatë ceremonisë, por opozita e pa dekorimin si një mesazh mbrojtjeje ndaj familjes Agasi.
Arrestimi i Ergys Agasit më 26 gusht 2026 e vendos këtë histori në një pikë të re. Njeriu që për vite është përfolur si një figurë e rëndësishme në prapaskenat e pushtetit, por që Rama nuk e ka pranuar kurrë publikisht si të tillë, tashmë ndodhet përballë drejtësisë. Dhe bashkë me të, në provë është edhe vetë kryeministri: jo vetëm për atë që ka thënë për Agasin, por edhe për atë që ka zgjedhur të mos thotë.
