Mbledhja dyditore e drejtuesve të Partisë Socialiste në Pogradec duket se nuk ka sjellë qetësi brenda kampit rozë, veçanërisht sa i përket garës për Bashkinë e Tiranës në zgjedhjet vendore të pranverës 2027. Ndërsa pranë kryeministrit Edi Rama në Pogradec qëndronte Ogerta Manastirliu, e konfirmuar prej tij si kandidate për kryeqytetin, mungesa e deputetit të njohur socialist Erion Braçe u shoqërua me një reagim të tijin publik në rrjetet sociale.
Përmes një mesazhi të drejtpërdrejtë nga Kombinati, Braçe ka lëshuar akuza ndaj mënyrës se si po merren vendimet brenda partisë, duke kërkuar garë të hapur dhe duke sfiduar drejtpërdrejt emërimin unilateral të kandidatëve.
"Nuk vlen njoftimi, është i vjetër!"
Braçe ka nëvizuar se anëtarësia e PS-së dhe qytetarët e Tiranës nuk kërkojnë emërime të vendosura në zyra të mbyllura, por përfshirje reale në vendimmarrje:
"Unë nuk besoj se socialistët duan një njoftim, por duan të vendosin. Unë nuk besoj se socialistët duan të votojnë një njoftim, por duan të zgjedhin kandidatin e tyre për Bashkinë e Tiranës!"
"Nuk pres një njoftim në mur apo në eter, nuk vlen njoftimi, është i vjetër; kriza që po jetojmë ka në thelb mënyrën se si vendosim dhe njoftimi, përjashtues përgjithësisht, nuk është më element i vendimmarrjes."
Edhe pse drejtuesit e partisë kanë nisur të japin sinjale apo konfirmime ndaj emrave të caktuar, Braçe bëri të ditur se ka nisur punën e tij në terren pa pritur asnjë "dritë të jeshile" nga lidershpi, duke konfirmuar ambicien e tij të prerë për të hyrë në garë:
"Jam edhe unë një nga të gjithë dhe nuk prita të më thotë dikush 'do jesh ti, puno tani'; jo, ndjeva njerëzit në rrugët e lagjet e Tiranës... po kuptoj qytetin dhe nevojat e tij rrugicë me rrugicë..."
"Po pres garën e do i shkoj deri në fund, si gjithmonë, për ta fituar këtë punë, se punë është!"
Sipas tij, baza socialiste dhe qytetarët e kryeqytetit kërkojnë të ndryshojë modeli i vendimmarrjes, i cili po bëhet "gjithnjë e më i ngushtë". Me këtë reagim të drejtpërdrejtë, Erion Braçe kërkon të hapë zyrtarisht një debat të brendshëm mbi demokracinë në PS, duke e bërë të qartë se gara për Tiranën nuk mund të mbyllet me një shfaqje nga Pogradeci.
Megjithëkëtë, thirrjet e tij të përsëritura deri tani kanë rënë në vesh të shurdhët.
