Kryetari i Partisë Demokratike, Sali Berisha, deklaroi se përballja e opozitës me qeverinë do të vijojë, por përjashtoi mundësinë e bojkotimit të Parlamentit.
Në konferencën për mediat, Berisha u shpreh se PD e ka të përcaktuar në statutin e saj se bojkoti i Parlamentit nuk lejohet. Sipas tij, mosmarrja pjesë në një apo disa seanca mund të jetë pjesë e aksionit opozitar, por nuk duhet të konsiderohet bojkot apo largim nga Kuvendi.
“PD, siç e dini, e ka të përjashtuar me statut bojkotin. E ka të përjashtuar. Natyrisht, të gjitha qëndrimet e tjera janë në tryezë, përveç bojkotit. Bojkot ne nuk bëjmë. Në qoftë se ne nuk marrim pjesë në një seancë apo dy seanca, këto s’janë bojkote, këto janë krejt tjetër, por ne vendim për t’u larguar nga Parlamenti nuk marrim”, tha ai.
Deklarata e Berishës vjen ndërsa demokratët paralajmërojnë vijimin e aksionit të tyre kundër mazhorancës, por pa e çuar atë deri te braktisja e mandateve parlamentare.
Megjithatë, kjo deklaratë sjellë në kujtesë vitin 2019, kur PD ndërmori hapin shumë më radikal të djegies së mandateve parlamentare. Por sot mësojmë se bojkoti qenka i ndaluar edhe me statut. Mbetet vetëm të kuptohet nëse kjo pikë është shtuar pas aventurës së vitit 2019, apo në atë kohë demokratët kishin vendosur të bojkotonin edhe vetë statutin e partisë.
