Alternativa për Gjermaninë (AfD) po forcon pozitat në skenën politike gjermane dhe, ndërsa kryeson në sondazhet e fundit, bashkëkryetarja e saj Alice Weidel ka zbuluar disa nga masat që partia synon të ndërmarrë nëse vjen në pushtet.
Në një intervistë për televizionin gjerman ZDF, Weidel foli për daljen e Gjermanisë nga Zona Shengen, mbylljen e kufijve dhe një politikë shumë më të ashpër ndaj emigracionit. Ajo kritikoi gjithashtu euron, duke argumentuar se ekonomia gjermane ishte në një gjendje më të mirë përpara futjes së monedhës së përbashkët.
“Do t’i mbyllim kufijtë dhe do të dalim nga Schengeni”, deklaroi Weidel, ndërsa kërkoi shtimin e dëbimeve dhe kufizimin e natyralizimeve. Ajo përmendi edhe kthimin e shtetasve sirianë që nuk plotësojnë më kushtet për të përfituar status mbrojtjeje në Gjermani.
Bashkëkryetarja e AfD-së sfidoi gjithashtu CDU-në, e cila vazhdon të përjashtojë mundësinë e bashkëpunimit me partinë e saj.
“Do të qeverisim fillimisht në landet federale. Dhe do të qeverisim edhe në nivel federal”, u shpreh Weidel.
Deklaratat vijnë ndërsa AfD po regjistron mbështetje të lartë në sondazhe. Sipas shifrave të cituara nga ZDF Politbarometer, AfD arrin në 27% në nivel kombëtar, kundrejt 22% për CDU/CSU. Ndërkohë, përpara zgjedhjeve të 6 shtatorit në Saksoni-Anhalt, mbështetja për AfD-në raportohet mbi 40%.
Partia mbetet një nga forcat më të debatueshme në politikën gjermane. Në maj 2025, Zyra Federale për Mbrojtjen e Kushtetutës (BfV) e klasifikoi AfD-në si një organizatë të konfirmuar të ekstremit të djathtë. Në shkurt 2026, Gjykata Administrative e Këlnit e ndaloi përkohësisht BfV-në që ta trajtonte partinë sipas këtij klasifikimi, deri në përfundimin e procesit gjyqësor.
Gjykata vlerësoi se ekzistojnë tregues të fortë për prirje antikushtetuese brenda AfD-së, por se në këtë fazë nuk është provuar që ato të karakterizojnë partinë në tërësi.
