Paris Saint-Germain ka vendosur të shpërblejë punonjësit e tij me bonuse të majme financiare, pas një sezoni të jashtëzakonshëm 2024/25, i cilësuar si ndër më të suksesshmit në historinë e klubit.
Pas fitimit të parë të UEFA Champions League dhe dominimit në garat vendore, klubi parizien arriti të gjenerojë të ardhura rekord, që raportohet të kenë shkuar në rreth 837 milionë euro, duke reflektuar suksesin si në fushë ashtu edhe në aspektin komercial.
Sipas L'Équipe, drejtori i përgjithshëm, Victoriano Melero, ka njoftuar stafin për paketën e shpërblimeve. Ajo përfshin një bonus kolektiv prej rreth 4,500 eurosh për vitin 2025, si dhe një pagesë shtesë prej 640 eurosh në vitin 2026.
Ky shpërblim përfiton rreth 700 punonjës të klubit, në sektorë të ndryshëm, si një formë vlerësimi për kontributin e tyre në një sezon historik, ku suksesi nuk u kufizua vetëm në arenën europiane, por në të gjithë performancën sezonale.
